發展局局長林鄭月娥得到候任特首梁振英（CY）垂青，七月一日幾可肯定會出任政務司司長。唔知係唔係同新老闆溝通得多，林太連講嘢都似足CY，佢尋日去東涌出席活動時就話，東涌好有潛力發展「橋頭經濟」，口脗同CY完全一樣。
CY過去出席地區論壇時，成日都將「橋頭經濟」掛喺口邊，認為咁樣做可以紓緩偏遠地區居民就業困難問題。下屆政府第一、第二把交椅咁合拍，果然係無縫交接喎。
