港大社會學系教授呂大樂就話，年輕人當然可以有佢哋嘅想像空間，但佢當年經歷過嘅英殖年代都唔係咁浪漫啫！就好似佢當年都唔知點解上地理堂時，連英國地圖都要讀埋﹗佢遲啲仲會出書，講吓自己所經歷嘅七十年代，佢話唔係要抗衡戀殖情緒，只係想講吓自已嘅故事啫！
呂大樂嘅新作，暫名《似曾相識七十年代》。前港督麥理浩當年大力興建公屋，又推出九年免費教育，仲成立埋廉政公署，一直被譽為大而有為嘅港督。不過呂大樂就話，麥理浩並唔係大家諗得咁勇於改革，佢對民主政制改革更加係避而不談，而早喺七十年代已經有聲音要推出公積金，不過當時就未獲採納，如果唔係，香港可能喺七十年代就已經有公積金喇。