政情：阿涂買BB玩具自己玩
立法會議員涂謹申今年四十九歲，首次有囝囝涂信之，同佢慶祝父親節。尋日阿涂同太太阿Sue帶信之去買玩具，雖然佢哋名義上係幫信之買玩具，但事實就係阿涂想買畀自己玩，名副其實係個大細路。
喺玩具店，阿涂不斷話啲遙控飛機、積木唔算太貴，仲同老婆講話想買。阿Sue話，佢哋屋企嘅玩具有啲係由信之表哥送嘅，其他好多都係阿涂買嘅，又爆料話阿涂差唔多玩過晒所有玩具。
雖然做爸爸嘅乜都想買，但似乎七個月大嘅信之就淨係對學行車情有獨鍾。佢尋日不斷眼仔睩睩咁望住學行車上面嘅玩具，又捉住隻啤啤熊公仔唔肯放手。
阿涂話父親節會同屋企人食飯慶祝，又話有老婆同BB陪住就係最好嘅父親節禮物。