政情：發叔回憶錄不提死敵
政治人物寫回憶錄，多數都係退休後先動筆，鄉議局主席劉皇發雖然年紀唔細，但仲未言退，不過就已經諗定寫回憶錄。
預料下屆會冧莊繼續做立法會議員嘅發叔日前喺大埔林村搞咗個盆菜宴，會上佢透露喺不久嘅將來會出版回憶錄，將佢五十幾年以來嘅從政心得一一記低，又話自己依家已經開始聯絡幫佢代筆嘅大學教授。
被問到因村屋僭建而同佢打對台嘅發展局局長林鄭月娥會唔會喺回憶錄出現，發叔就斬釘截鐵咁話「我同佢無嘢好講」，不過又話：「我睇佢惡得幾耐。」林鄭鐵腕要拆新界僭建物如果都唔落入發叔本回憶錄裏面，咁佢揀題材都好嚴格喎。
對於會唔會留任行會，發叔唔肯講，只係話「遲啲你哋就會知o架啦！」講到呢度，發叔喺衫袋入面珍而重之咁攞咗一本叫《慈恩銘心》嘅深藍色書仔出嚟，話入面寫有佢已故嘅媽媽同細佬妹嘅資料。好明顯，都係有意轉移視線啫。