政情：曾鮑笑薇掩耳避追問
曾蔭權貪威識食，幾次外訪都住總統套房，又貪盡海陸空，仲幾乎入住深圳六千幾呎嘅「禮賓府」。佢嘅夫人曾鮑笑薇尋日出席活動，再被追問貪曾啲衰嘢，佢一度用手掩住耳仔。唔鍾意聽嘅嘢唔想聽到係人之常情，但係事實擺在眼前，係咪聽唔到就當無事？
曾太尋日以香港紅十字會會長身份，頒獎畀舊年捐血最多嘅市民，但佢姍姍來遲，又極速頒完獎閃人。貪曾醜事多籮籮，包括涉嫌以賤價租地畀英國貴族學校哈羅，又超豪外訪濫用公帑，佢原本喺深圳有「禮賓府」，已經被迫退租。兩人七月一日會搬去邊度住？曾太咁多家當又點處理呢？記者連串追問，曾太都拒絕回答。
喺進入會場時，曾太對所有問題都充耳不聞，更索性用右手掩住右邊耳仔，個樣仲幾唔耐煩，有啲黑面，好急步就入咗去，離開時亦只係講咗幾次：「多謝大家關心。」