政情：貪曾騎呢騷 「搞慶回歸」
東方報業集團日前獨家踢爆特首曾蔭權爵士貪到盡荒廢政事，連回歸十五周年嘅紀念活動都懶得搞，真係嚴重失職。貪曾政府終於都要急急補鑊，好鬼祟咁喺政府新聞網度新增咗個回歸十五周年專頁，介紹一部分回歸活動，仲拍咗條短片供市民瀏覽。以往特首唔會親身上場宣傳活動，今次貪曾居然親自撰文介紹，企圖掩飾佢嘅過失，不過篇嘢嘅內容就同佢為官態度一樣hea到爆，寫咗等於冇寫。
以往每逢七一將至，街上都會張燈結綵，逢五及十周年，政府更會開晒記者會，高調宣傳紀念活動，但東方報業集團日前發現，今年回歸十五周年，政府唔多公布活動安排，街上亦未見相關布置，氣氛冷清清。政府新聞網尋日新增嘅回歸十五周年專頁，內文劈頭第一句就死撐「走在街上，不難見到各區的燈柱上飄揚着數以千計的彩旗」，就算街上有彩旗，都係急急咁掛嚟補鑊。文中更加隻字不提新政府上場，梗係啦，七一係貪曾下台之日，梗係刻意迴避傷心事。
網頁上載咗逾三百項紀念活動，點解有咁多，其實咪因為將會創造健力士世界紀錄嘅青年大匯演、配合龍年主題嘅龍舟賽同升旗禮、煙花匯演、大巡遊等掃埋一碟篤數囉，最騎呢嘅一項係「港島西雨水排放隧道及荔枝角雨水排放隧道啟用禮」，明明係防洪措施，同回歸主題簡直大纜都扯唔埋，咁都當做紀念活動之一，令人啼笑皆非。
乾隆秘密花園惹聯想
講到最應景嘅紀念活動，相信係「乾隆皇帝的秘密花園」展覽，呢個秘密花園，據講係當年乾隆諗住興建畀自己退休，頤養天年之用，足足花咗近二十年時間建成。講到退休，不期然令人諗起貪曾早前偷偷哋以超值價租住深圳東海花園超豪複式住宅，作為退休後入住嘅「禮賓府」，可惜畀東方報業集團揭發佢嘅醜行，令到佢冇得住呢個「秘密花園」之餘，仲惹埋一身蟻。政府喺呢個時候舉辦展覽，都唔知係攞景定贈興喇！