中環出更：美食兵團遠征波爾多
兩年一度嘅波爾多紅酒節今年舉行，波爾多市邀請香港作為榮譽城市參與其中。為咗把握呢個宣傳香港嘅大好機會，旅遊發展局召集城中四間知名食府嘅廚藝大師組成美食兵團，遠赴當地炮製特色美食，不過要征服法國老饕嘅味蕾，都要絞盡腦汁克服困難。
為期四天嘅波爾多紅酒節於本月廿八日開始，美食兵團早於幾個月前就開始研究菜式。
名廚炮製特色中菜
其中六國酒店中菜行政總廚馬榮德，就將一款原為釀蟹蓋嘅熱葷菜式，改作名為「羅漢金甲」嘅素菜。馬師傅嘅難題係，法國政府對於食品入口管制非常嚴格，而法國人無乜見過蟹蓋，所以運送蟹蓋至當地必會遇上海關嘅阻滯，好彩蟹蓋當係容器而唔係食物，至可以過關。蟹蓋裏面釀嘅會係米飯蛋白配上松茸菇菌，表面再覆以南瓜蓉加芝士粉焗製，其中嘅菇菌，會喺法國就地取材。
中菜靠鑊氣，但活動因為場地所限不得明火煮食。帝苑酒店中菜部行政總廚何偉成決定以豉椒味菜爆雞球奉客，因為甜椒味菜與雞肉都係快熟嘅，況且甜甜酸酸嘅味道又正合老外嘅胃口。添好運點心店主廚麥桂培就話，春卷與叉燒包都好受外國人歡迎，所以佢會以呢兩款點心嚟奉客。培哥話法國嘅春卷皮品質甚佳，加上旅發局以當地嘅廚藝學校作「探子」，搵到一間專營亞洲食材嘅超市，所以唔擔心材料問題，就算叉燒包嘅靈魂「叉燒汁」，佢話只要花啲時間調校，保證一眾食客回味無窮。
將會隨團出發嘅旅發局主席田北俊就話，出席紅酒節嘅人士只要付出五至十歐元，就可以享受佳餚美點，絕對超值，不過最重要係令人食過翻尋味，吸引更多人嚟香港旅遊。
卓妮