護短好講技巧，一不小心，好易捉蟲，政制及內地事務局局長譚志源（Raymond）尋日就喺立法會大會上做咗個真人示範。話說公民黨連續兩星期就副局長同政治助理嘅工作表現提出質詢，上星期曾問副局同政助出席活動嘅次數，當局仲提供埋有關數字。不過，當尋日再問政助聯絡政黨嘅次數時，當局話無相關數字喎，都唔知搞乜。
Raymond就回應話，政助同政黨及獨立議員每天都有「恒常嘅政治聯繫工作」，但呢啲政治工作好難逐一記錄，所以當局提供唔到有關數字。講真，呢啲所謂政治聯繫工作，大部分都係聯繫建制派，事關泛民主派議員經常話搵唔到啲政助嘅，擺明係親疏有別，既然係咁，又點會白紙黑字留低紀錄吖，加上政治聯繫好難量化，例如同議員打個眼色「溝通」，應該點寫好呢？
原本無紀錄問題不大，但錯就錯在Raymond上星期列表拋數字出嚟撐政助有工作表現，於是就搞到尋日捉蟲喇。再講吖，政助嘅成績表係點，市民、議員心中有數，就算將下屆政助月薪減到最高十萬元，亦都係畀多佢！