政情：紅白藍之父 同社企拍住上
紅白藍膠袋係好多香港人嘅集體回憶，十幾年前已將紅白藍應用於藝術創作嘅著名藝術家又一山人，繼幫候任特首梁振英（CY）設計競選齊心標誌、橙色制服等文宣及物資後，近日又幫新生精神康復會營辦嘅社會企業「紅白藍330」，設計多種紅白藍潮物，店內仲加設本地設計師麥雅端嘅Chocolate Rain百家布系列等精彩產品，認真點子多多。
十幾年前，又一山人首次為老土嘅紅白藍注入新生命，掀起一陣熱潮，為佢贏得「紅白藍之父」稱號。今次係佢首次同社企合作，喺太子道西花墟開設嘅全港首間紅白藍主題概念店「紅白藍330」，銷售象徵港人堅毅不屈、拚搏精神嘅紅白藍衣物、杯碗、手袋等家品，至啱潮人一族買嚟送畀外地親友或自用喇！大家得閒去行一趟，包保有驚喜。
