政情：九龍木球會 委員集體辭職
香港有唔少老牌私人會所，要畀好多會費先至可以入會，所以入得去嘅會員都係非富則貴，就好似由香港律師會前會長葉天養做主席嘅九龍木球會，就係其中之一。不過，呢個位於九龍覺士道嘅富貴球會，最近傳聞因為人事問題，委員會內十五個委員中，有十三個都辭咗職，依家只剩番主席葉天養同一名司庫留任，委員會明日就會召開會員大會重選。
據聞近年致力推動各項本港球類運動嘅民政事務局副秘書長麥敬年，本來都係九龍木球會委員會成員，但委員會名單已經唔見咗佢個名，我哋曾經打電話問佢點解退出有關委員會，佢就透過秘書回覆，叫我哋問番球會喎。
我哋亦問過主席葉天養，佢回覆時話自己同司庫都無請辭，並承認會重選委員會。佢又話依家個會由一名總經理負責管理，強調總經理係由委員會通過聘請嘅，一切運作如常，仲多謝我哋關心個會添！