政情：黨友表態 挑戰葉國謙
「更新換代」成為各大政團嘅大趨勢，好似民建聯一直都提倡讓年輕新一代上位，只可惜有部分議席長期被黨內老臣子霸住，遲遲都無換人迹象，其中該黨黨團召集人葉國謙，如無意外會第三次循區議會界別競逐連任。有黨友對葉國謙霸住個位好有意見，該黨黃大仙區議員何漢文就率先表態有意挑戰佢，而該黨新界區兄弟亦醞釀推舉代言人披甲上陣，為佢連任造成障礙。
區議會界別議席過去一直係建制派嘅天下，葉國謙首次循呢個界別參選係二○○○年，如果今年九月再次成功當選，將會係佢第三次成為該界別議員，任期長達十二年。
有人形容，葉國謙霸住議席嘅程度，好似霸住個屎坑唔願走咁，人哋工聯會都有不成文規定，勞工界界別議席最多只准做一屆四年就要落任，點解被譽為立法會大黨嘅民建聯會落後於形勢喎。
何漢文證實有意思參選
有黨友為咗打破呢個政治悶局，願意企出來挑戰葉國謙，呢位挑戰者就係何漢文，據聞佢至少取得十幾名區議員撐佢。現年四十五歲嘅何漢文，本身喺東九龍居民委員會主席，該會一直心思思染指立法會議席，只係未搵到合適機會小試牛刀。我哋就此問過何漢文，佢證實確有意思想參選，但強調唔係志在個位，反而最想引起黨內討論，因為無理由一個人可以做三屆咁多喎。
新界區欲推劉國勳上陣
除此以外，據聞該黨新界區好多兄弟都蠢蠢欲動想推舉代言人參選，當中以「票王」北區區議員劉國勳嘅呼聲最高，最主要係睇中佢知名度較高，加上地區工作紮實。劉國勳話感謝各位兄弟嘅厚愛，但強調自己未諗過，重申無人搵過佢，佢會以大局為重，唔想造成任何矛盾喎。
其實民建聯早前亦因為九龍西嘅出戰人選安排而激起內部兄弟矛盾，如今區議會功能界別又掀起紛爭，睇嚟該黨高層應該正視問題，否則無論栽培幾多副發言人出嚟，無得上位做議員都係得個吉，甚至觸發退黨潮，唔通真係同個黨講感情咩！