中環出更：金茶王大賽又嚟喇！！
香滑奶茶，係唔少港人每日嘅精神泉源，為咗發掘出色嘅靚奶茶及推動奶茶文化，咖啡紅茶協會快將舉辦第四屆「國際金茶王大賽」，尋日更為大賽舉行啟動禮。
主席黃家和（Simon）笑言，諗番起前三屆比賽嘅點滴，感觸良多，興奮到瞓唔着喎，但其實佢興奮另有原因，就係佢快將榮升爺爺，新抱Iris懷小龍女七個月，真係恭喜晒！
Simon尋日請來前三屆「金茶王」即場炮製香滑奶茶，茶香四溢，品牌發展局主席陳淑玲、中西區區議會副主席陳學鋒、潮州商會副會長張成雄等嘉賓試飲後都齊聲大讚。
陳學鋒唔飲唔安樂
Simon話，今屆比賽增設廣州賽區，仲會邀請非洲、越南、印度、斯里蘭卡等業界人士來港交流沖茶文化，並將港式奶茶進一步推向世界。
陳淑玲話，一杯小小嘅奶茶之所以能夠衝出國際，皆因佢唔淨止係飲品，仲係代表住香港人嘅精神。佢坦言愛飲奶茶，有時公幹，人在他鄉，難搵港式奶茶，都會喺飛機上飲番杯。
陳學鋒都係奶茶超級粉絲，每朝早餐必定歎番杯，呢個習慣已經維持多年，唔飲唔安樂喎。福苑集團主席盧浩宏都有嚟湊熱鬧，佢去年擔任比賽評判，發覺沖奶茶真係好講究，同樣嘅材料，味道可以差好遠。
身為「潮人」嘅張成雄就話，平時除咗飲功夫茶外，奶茶係第二選擇，貪佢香滑順喉喎。
卓妮