中環出更：單拖黃志祥 行街四圍望
通常富商名流出入公眾場所，總會帶番幾個保鏢跟身，以策安全。不過，信和置業主席黃志祥就似乎無有怕，經常一個人行街、搭港鐵，皆因佢警覺性甚高。前幾日黃昏時間，卓妮路經中環置地廣場，又見到黃志祥一個人行街，佢一手抽住個書店嘅膠袋，一手拎住部手機「煲粥」，連保鏢都無帶出嚟，表現得相當淡定。
黃志祥邊傾電話，由二樓搭扶手電梯到地下，忽然機警向上一望，發現卓妮嘅存在。見慣大場面嘅佢，好鎮定咁由一樓上番二樓，之後就帶卓妮「遊花園」，喺置地廣場同歷山大廈之間兜咗幾個圈，步速時慢時快，莫非佢係想試探有無被人跟蹤？最後，佢喺Cova餐廳附近消失於人潮之中。呢一招防禦戰術咁奏效，難怪唔使出動保鏢喇！
卓妮