由新入行到咬長糧，警察叔叔從未開過嘅槍，江湖兒女稱之為「善良的槍」。大家有冇諗過，原來香港都有一條從未用過嘅「善良的法」？
即係咁，環保署煞有介事推出停車熄匙法例，目的係改善空氣污染，停車之後如果超過三分鐘唔熄匙，任得車輛噴廢氣，執法人員就可以發告票。之但係奇怪現象出現咗，法例實施半年以來，執法人員從未發出過半張罰款通知書。既然係零檢控，你話嘞，停車熄匙法例係咪善良到人間罕見呢？
環保署官員話喎，執法之時必須近距離見到車匙插住並且啟動引擎先至開始計時，執法人員亦唔會刻意隱藏，以確認車輛有冇震動同排出廢氣，大多數司機見到咁嘅情況，都會合作熄匙，所以至今未有檢控個案。當局仲話，執法嘅主要目的係教育司機，希望改變駕駛者嘅行為態度，養成停車熄匙嘅習慣，唔係為咗懲罰。
講到好似好偉大咁，不過環保團體就唔認同嘞。長春社理事熊永達表示，停車熄匙根本難以執法：「真係唔明當初條例點解咁立，要個執法人員喺架車隔籬計時足三分鐘，正常司機都會即刻熄匙，仲難過捉人隨街吐口水。」熊永達建議政府研究可以遠距離得知車輛有否熄匙嘅儀器，配合錄影作為證據，執法人員先至能夠檢控違例司機。
計功夫茶話齋，呢條善良的法一早講咗冇鬼用o架啦，係環境局局長邱騰華先至傻到阿茂整餅之嘛。推出半年零執法，好聽講句係善良，難聽講句就係廢柴。有法難執固然係形同虛設，若然執法非常之咁容易，動不動告到司機甩褲，又會變咗乜呢？擾民囉，到時就唔係善良的法o架喇，而係惡魔之法！
其實講到尾，改善空氣污染唔應該細眉細眼，必須大刀闊斧，否則只係一場遊戲一場空。譬如話，邱騰華應該好好管束電力公司吖嘛，畢竟燒煤發電係排放廢氣嘅超級大戶，試問停車熄匙幾多萬次先至夠填發電污染條數？至於內地工廠嘅污染問題，香港雖然冇權直接過問，不過都可以強烈反映吖，冇理由完全不設防，容許內地廢氣來港自由行啫，你估內地廢氣識得瘋狂消費刺激經濟咩！
無論如何點都好，距離七月一日政府換屆愈來愈近，夕陽政府人亡政息已成定局。功夫茶有一個願望，下任環境局局長必須交足功課，千祈唔好學似邱騰華咁一事無成。喂，一事無成四粒字唔係老屈o架，每年有一千人由於空氣污染而提早死亡，閻羅王開恩，先至冇發告票檢控「氣候逃犯」曾蔭權及邱騰華草菅人命咋！