自本報連番揭發特首曾蔭權爵士貪遍省港澳後，審計署再踢爆貪曾藉公費豪住總統套房，全城媽聲四起，一面倒要求他立即下台謝罪！連工聯會榮譽會長陳婉嫻都話貪曾道歉絕對唔夠，理應即時請辭，等市民消消氣！教育界有團體講到明：貪曾不應出席任何教育活動，深恐一個未能潔身自愛嘅特首，會玷污教育界形象！
做特首做到如過街老鼠，甚至有網民作狀掌摑佢嘅蠟像，貪曾都算寫下獅子山下不朽一頁，未知貪曾會唔會感觸：七年臥藏禮賓府如一夢，此身雖在堪驚！
之不過咁，貪曾舔到盡嘅嘴臉已成佢註冊嘅icon，本報美術設計嘅「貪」字加上個血紅煲呔，真係醒目過隻似蟲多過似飛龍嘅logo！
貪曾貪小便宜，除了碌卡攞着數，一菜一雞唔放過，原來執定包袱，花盆都唔益下家！老朽諗起《笑林廣記》有個笑話，講一個知縣壽辰，因其生年肖鼠，屬員們便集資鑄了一隻金老鼠去作賀禮，知縣收受之後，另尋了機會對一眾下屬說：明年又咁啱係賤內的整壽，佢細我一年，係屬牛㗎！
魯迅曾有感而發，如果大家先不送金老鼠，知縣決不敢想金牛，又話金牛貴，班芝麻屬下無能力致送，即便送了，怕他姨太太的生肖也會屬象。
魯迅夠抵死，諷刺盡天下貪婪官僚人心不足蛇吞象嘅心態；老朽相信，主角換了是貪曾，一於改寫十二生肖，我煲呔曾爵士係屬暴龍一族！