立法會議員有時為咗宣傳，間中都會抽吓水，但估唔到連一碟炒冷飯都唔放過。尋日內務委員會召開特別會議，繼續討論政府剛發表嘅人口政策報告。對住呢碟遲咗十年先至出台嘅炒冷飯，真係鬧佢都嘥口水，但正因為報告空洞無物，於是好易成為議員嘅「抽水」工具。
話說報告揭示十五至十九歲年齡組別嘅失業率有百分之十一咁高，正當好多議員都關注係咪本港教育制度出現問題，導致呢班應該就學嘅年輕人加入失業大軍嘅時候，工業界林大輝就話，年輕人失業問題亦反映政府對中小企支援不足，事關中小企無錢請人，年輕人咪失業囉！
至於飲食界張宇人對年輕人失業問題有另一番見解，佢話當日一早叫政府唔好一刀切將最低工資定喺時薪廿八元，僱主對住一啲十六、七歲、而且毫無工作經驗嘅後生仔又點會肯畀廿八元時薪吖，所以歸根究柢，話年輕人失業問題都係由最低工資引發喎。聽完佢哋咁講，真係大開眼界。