政情：環保鬥士為直選造勢
近年積極推動本港綠色經濟嘅大埔區議員邱榮光，最近除咗加入經濟動力外，亦對立法會議席虎視眈眈，佢尋日同傳媒聚會時，就表明會積極考慮參選九月立法會選舉。從佢尋日獲來自北區、大埔、沙田及西貢等多個鄉事委員會成員現身「晒冷」支持嚟睇，相信佢九成會出選新界東，同場仲有多名環保科技聯盟成員撐場。
邱榮光為大埔樟樹灘原居民，九七年與環保結緣，創立了大埔環保協會，現與五個環保教育中心合作，鼓勵塑膠廢料回收、利用廚餘轉化成有機肥料等環保工業，主打綠色經濟。邱榮光話，環保應該是全民參與，立法會內應有人為業界發聲，鼓勵本港發展綠色經濟，改善市民生活質素喎。唔知佢係咪暗示自己想喺立法會為業界發聲呢？
趁住尋日係世界環境日，邱榮光聯同漁農、環保及餐飲業界，推廣以本地有機魚、蔬、禽等食材為主的六道菜式環保餐單，鼓勵市民辦喜宴時採用。