身兼平機會政策及研究專責委員會召集人嘅阿基，尋日朝早就同平機會主席林煥光、委員會副召集人謝永齡帶咗十幾個少數族裔人士去候任辦，話要同CY講吓少數族裔人士嘅教育問題。
帶少數族裔上候任辦
咁啱得咁蹺，阿Ann下晝亦喺曾鈺成等黨友陪同下，同埋二十個印巴裔人士一齊去見CY。
據聞阿Ann係因為阿基朝早去見CY，所以先至臨時臨急喺下晝拉隊上候任辦見CY補鑊。我哋就此問過阿Ann，佢就話係經該黨少數族裔委員會安排去見CY嘅，但就無講到係喺幾時打去候任辦約見面喇。
不過，無論遲約或早約，呢單嘢已經畀阿基飲咗「頭啖湯」，就算阿Ann下晝拉隊去候任辦補飛，曝光率始終都係輸蝕啲喇。