政情：建制派鬼打鬼 工聯告急
九月立法會選舉選情波譎雲詭，泛民主派同建制派對壘唔在講，建制派內部「鬼打鬼」爭位亦好戲連場。建制派三個人出嚟選超級區議會已成定局，坊間一直認為，建制派票王呢個封號，工聯會榮譽會長陳婉嫻肯定有機會，但有重量級政界人士就分析，民建聯安排立法會議員李慧琼（Starry）出嚟爭超級區議會議席，肯定會扯走嫻姐唔少票喎。
工聯會嚟緊立法會選舉會全力出擊，採用風車戰略，由嫻姐選超級議席，帶動其餘五區全力參加直選，所以嫻姐得票幾多，對工聯會嚟講係重要嘅指標，可以測試地區支持度之餘，得票多更加可以振奮軍心。本來如意算盤都打得好哋哋，點知中途殺出個Starry爭食，有政界人士估計，以民建聯吸票唔手軟嘅風格，肯定吸走嫻姐唔少婦女票，所以工聯會呢次都幾頭痕。
除咗超級區議會選舉，九龍東亦係工聯會另一個危機所在。該會立法會議員黃國健將競逐連任九龍東議席，雖然佢今屆表現唔錯，但就同嫻姐處境相同，中途殺出個旅遊界議員謝偉俊（Paul）空降參選。由於阿Paul得到西環配票支持，應該可以繼上屆九龍西梁美芬之後，另一個以專業人士身份以直選進入立法會嘅獨立建制派人士。
最怕選民唔識投兩票
地區消息就話，阿Paul近來唔滿足已獲分配嘅區份，不時「跨區」拉票，連民建聯同工聯會嘅支持者都唔放過，情況令黃國健好無奈。唔單止咁，據聞工聯會依家最怕就係選民唔識投兩票，以為一票投咗畀嫻姐就可以好似上屆咁，送埋黃國健入立法會，所以工聯會啲地區樁腳已經加緊教導選民，投票當日一定要投足兩票喎，否則啲票流咗畀阿Paul，黃國健輸咗咁就喊都無謂喇。