中環出更：李國寶去到邊瞓到邊
立法會「四大懶蟲」之一嘅金融界李國寶，平時出席立法會快閃幾乎係人所共知，但原來佢坐耐少少就會瞌眼瞓，甚至瞓着覺。煤氣公司尋日下午喺中環ifc舉行一百五十周年慶祝活動，李國寶獲邀出席，但坐喺台下嘅佢，唔知係咪之前午餐飽得滯，受睡魔引誘下不斷「釣魚」，醒吓瞓吓，喺大孖沙面前出醜，真係有損立法會形象。
話說尋日煤氣公司職員喺台上發表講話，台下嘅李國寶個睡眼惺忪樣就出晒嚟，其後更突然畀睡魔急call，不斷喺度「釣魚」，之後更索性合埋對眼約十秒，幾經努力先睜番開半隻眼，認真唔好睇。事實上，李國寶喺立法會「三點不露」嘅作風，大家已經見怪不怪，但出席人哋活動都咁瞓法，不如快啲返屋企瞓覺罷啦，相信到時想點瞓法都無人理佢！
