有人擇善固執，盡忠職守到最後一分鐘，例如內地一個叫吳斌嘅司機。有人擇惡固執，貪得無厭到最後一秒鐘，例如香港一個叫貪曾嘅特首。如果，命運能選擇，功夫茶寧願吳斌做香港特首，曾蔭權做內地司機，呢個世界應該冇咁嘔血。
吳斌嗰個古仔，簡直係人間典範。身為杭州長運集團大型客車司機嘅佢，從無錫載客駛返杭州，途中失驚無神一塊鐵迎面擊碎擋風玻璃，重創吳斌腹部同手臂，導致肝臟破裂並且多處骨折。就喺千鈞一髮嘅危急關頭，英勇司機強忍劇烈痛楚將客車慢慢煞停，完成一系列避免車毀人亡嘅適當措施，然後打開車門，安全疏散乘客，成功挽救二十四人，可惜吳斌最終搶救無效溘然長逝。換言之，有人去到生命最後一分鐘都要堅守崗位，名副其實鞠躬盡瘁，死而後已。
功夫茶之所以咁敬佩吳斌，一來覺得醜陋的中國人仍然有些微希望，二來咯喎，係想話畀貪曾聽，人哋一息尚存都要完成任務，唔似得閣下戀棧權位舔到盡，受到全城譴責都唔肯引咎辭職。
曾蔭權嘅貪腐醜聞真係長揭長有o架，審計署不單止認為特首外訪入住總統套房係不當行為，而且建議特首辦探討使用公司信用卡，以免碌卡積分被私吞。東方報業集團記者向特首辦查證，曾蔭權外訪嘅時候，有冇使用私人信用卡簽帳墊支公務消費呀？哈，特首辦再一次拒絕交代詳情。既然特首辦剝削公眾知情權，東方記者惟有自己計數。根據審計署列出曾蔭權外訪酒店開支，貪曾如果以私人信用卡簽帳可獲超過二百二十五萬積分，換取總值約一萬元嘅禮品或服務。
喂，用公帑搭飛機已經涉嫌將飛行里數私有化啦，若然曾蔭權再將信用卡簽帳積分據為己有，呢一個晚節不保嘅貪腐特首真係好鬼死樣衰囉！
本來呢，立法會議員可以啟動彈劾程序或者不信任動議，弊就弊在本地政壇有太多識時務者為俊傑嘅擦鞋仔，一味為貪曾提供包庇服務。你估有議員本周五喺內務委員會會議之上，提出向曾蔭權展開不信任動議，會有乜嘢後果吖嗱？九成九會被顛倒是非嘅保皇派一嘢否決，鬼叫親疏有別嘅貪曾同佢哋臭味相投咩！
計功夫茶話齋，就算政府換屆前呢一個月之內始終冇辦法迫使曾蔭權滾蛋，以後都要慎防貪官污吏繼續禍港殃民。設立完善嘅防腐機制當然有必要，另外咯喎，必須大腳踢走保皇擦鞋仔。今年九月立法會選舉，各位選民請認清楚包庇貪曾嘅政客真面目，唔用選票狠狠懲罰難消心頭之恨呀，老友！