貪曾昔日吹着口哨接任特首，今日身為爵士嘅佢，搞到灰頭土臉，其實應了「人必自侮而後人侮之」嘅道理，如果佢唔係貪到咁離譜、舔到咁盡，用追求貪威識食千分之一嘅心擺落施政、改善民生，咁佢用特權欣賞畢加索，住十次八次總統套房，冇人夠膽話佢唔適當！
《孔子家語》有一則名言：有日魯哀公向孔子請教國家嘅存亡禍福，是真的有天命存在，不僅僅是人事上的關係而已嗎？孔子答：「存亡禍福，皆己而已，天災地妖，不能加也。」孔子所要傳達嘅概念，無非強調國家的存亡、禍福，非關天命，而在人事上的作為！
大家看看夕陽政府等收工嘅心態，就知今日香港民生多艱，政策失時，全是地妖作怪！貪曾舔到盡之嘴臉，已成揮不去嘅icon，其管治團隊，高官一個二個出事，上樑不正下樑歪。搞環保有姿勢冇實際嘅邱騰華，在任期間亦外訪多達六十次，花費一百八十二萬！阿哥，環保盲出外偷師，最叻都係搞出個擾民「膠袋徵費」同廢柴「停車熄匙」，而香港不但見唔到藍天，空氣污染沒有最壞，只有更壞！
講開就把火，禽流感殺到，統領防疫戰線嘅周一鑊同林秉恩就各自各威，一個在南丫島歎海鮮，一個在「榮休晚會」杯上杯落，香港人真係感謝你哋嘅貢獻唔少咯！有道是「人至賤則無敵」，今從貪曾身上，吾人更領略「人至貪則無恥」，夕陽政府，有乜係好榜樣？有！狂花公帑，問心無愧！