政情：林健鋒硬銷 橄欖頂唔順
廣告策略有好多種，其中一種就係洗腦式咁重複品牌個名。身兼經濟動力召集人嘅立法會議員林健鋒（Jeffrey）尋日就喺立法會財經事務委員會會議上示範咗呢招，喺短短幾分鐘發言裏面，語帶雙關咁重複咗四次「經濟動力」呢四個字，搞到連主持會議嘅委員會主席陳鑑林（橄欖）都忍唔住打斷Jeffrey嘅發言。
財政司司長曾俊華尋日喺立法會講經濟近況及短期展望，班議員見財爺親自嚟到立法會都踴躍提問，Jeffrey都唔例外。Jeffrey就話希臘政府畀人話佢淨係使錢，冇儲備先搞到咁，「希臘嘅敗筆係冇經濟動力，香港有經濟動力，市民好支持經濟動力要加強，政府點樣令我哋經濟動力更強？令我哋嘅投資、經濟、就業好？」
短短幾句說話，Jeffrey都可以重複四次提到「經濟動力」，真係硬銷到在場人士都忍唔住笑。後來更因為佢嘅發言太冗長，橄欖不得不叫停佢嘅發言，留番啲時間畀財爺回應。