煲呔曾○八年首設嘅副局長同政治助理表現差強人意，政圈都關注候任特首梁振英會搵啲乜人重塑公眾對政治委任官員嘅信心。有傳中大工程學院副院長（外務）黃錦輝會做科技及通訊局副局長，同疑似科技及通訊局局長、理大行政副校長楊偉雄「拍住上」，據聞二人相識近十年，相信必定熟知對方作風，唔知相識多時會否有助黃錦輝脫穎而出呢？
資訊科技界一向好多精英才俊都有意服務社會，有傳黃錦輝就係其中一人，仲有機會入政府做副局長添。黃錦輝同我哋講，至今未有人正式邀請佢，但佢坦承有業界同朋友都同佢傾過類似嘅問題，佢一直抱住嘅心態係，倘有機會，喺任何崗位服務社會都會考慮。
除咗同楊偉雄相識多時外，原來黃錦輝同候任辦主管羅范椒芬都有淵源，佢哋同時係專業及資深行政人員協會理事，亦係專資會轄下教育小組嘅成員，黃錦輝同梁營中人都幾有緣分喎！