民主黨早前陣前易將，改派黨內知名度最高嘅主席何俊仁出戰九月立法會選舉嘅超級區議會議席，原意係想發揮明星效應，力抗建制派嘅重量級對手，同時帶起白鴿黨喺五區直選嘅候選人。但最近佢哋卻發現今次換人可能會帶來反效果，泛民支持者喺分票思維下，可能會選擇支持何俊仁但唔支持該黨嘅直選候選人，變陣變到作繭自縛。
據黨人分析，泛民支持者對民主嘅忠誠度高，但未必會瞓身支持同一泛民黨派。
泛民喺多屆立法會直選中都分開名單參選，佢哋嘅支持者早已習慣分票，例如老公投民主黨、老婆就投公民黨或民協等，認為咁樣先至夠公平同對整體泛民最有利。因此今次民主黨改派鐵頭仁出選超級，隨時會令該黨喺五區直選輸凸，贏一席輸五席。為免噩夢成真，民主黨嚟緊會加強宣傳同教育佢哋嘅支持者，希望佢哋兩票全投該黨，唔好益其他泛民，但啲選民會否咁聽話，真係未知之數。左計右計下，民主黨原來走喺鋼線之上。