政情：搵定接班人 譚偉豪贏梗?
九月立法會選舉烽煙四起，傳統上建制同泛民實力不相伯仲嘅界別競爭激烈，據聞資訊科技界好大機會再次由現任議員譚偉豪（Samson）同香港互聯網協會創會主席莫乃光（Charles）一較高下，雖說戰情緊湊，好難講邊個有十足把握，但Samson就好有信心，一方面諗定第時有邊個可以接班，又疑似「皇帝女唔憂嫁」，要諗過度過至決定係咪加入其他政黨或組織喎。
建制派同泛民主派傳統上喺會計界、工程界同資訊科技界嘅實力都係旗鼓相當，就以○八年嘅資訊科技界為例，Samson只以數十票之差擊敗Charles，及至去年底，Charles喺特首選舉委員會選舉中，以高票當選資訊科技界選委，Charles如無意外將強勢回歸，再次同Samson一決高下。
點名洪為民係人選之一
對於呢個「老對手」嘅挑戰，Samson笑言「有少少驚」，但轉過頭又好似好胸有成竹，力數自己成功爭取成立科技及通訊局嘅工作成績，甚至自爆已經開始搵緊接班人。佢首次透露計劃只做兩屆功能界別議員，如果要繼續做議員就轉戰直選，又點名菁英會主席洪為民（Witman）係可能接班人之一，笑言對方淨係做互聯網專業協會會長「屈就咗佢」喎。被Samson點名大讚嘅Witman保持一貫謙虛態度，話一切言之尚早，又話會繼續支持Samson角逐連任。
心郁郁諗緊未來動向
除此以外，Samson仲心郁郁諗緊自己未來嘅動向，疑似徘徊喺重組「五散人」、加入新民黨同地區組織C18三者之間。新民黨主席葉劉淑儀同Samson合作多時，據聞葉太不時向Samson招手，但政黨嘅影響力同議席數目多寡成正比，相信葉太都要加把勁先有機會令Samson心郁；至於Samson會否情歸C18，據聞主要視乎C18會否重新壯大，以及Samson會否轉戰直選，但講到尾，呢一切諗法暫時都係空中樓閣，大前提係Samson要連任成功先至有得諗。