中環出更：大力士周伯展 食蕉當飯
眼科名醫周伯展，因為力挺候任特首梁振英，早前有消息話佢會加入政府。不過，周醫生明言唔會從政，寧願投身內地「救盲」工作。原來佢仲有另一項興趣，就係健身，月前初次參加全港舉重比賽，三扒兩撥就輕易勇奪個人組別冠軍，天生神力，絕對稱得上係醫學界嘅大力士。
體重一百五十磅嘅周醫生，午餐只食兩隻香蕉，身材唔算健碩，點睇都唔似大力士。但佢月前膽粗粗上一堂舉重課後參賽，輕易奪冠。咁勁，原來多得後生時訓練有素，周醫生自爆那些年係港大壘球隊最佳投手。執業後，每星期堅持打壁球，喺多個公開賽獲獎無數，眼科聖手林順潮、醫管局行政總裁梁栢賢，都係佢波友。
培訓徒弟 無時間做官
不過，要數最大興趣，仲係培訓徒子徒孫。周醫生以「亮睛工程」副主席身份，拍住主席林順潮喺內地救盲復明多年，至今已教曉內地七位眼科醫生做白內障手術，呢個月甘肅將有第廿三間亮睛眼科中心，佢會親自北上主持開幕，七月再同家人遊地中海充電。咁忙，試問又邊有時間做官呢？
卓妮