中環出更：陳文綺慧自爆 一屋六個東華人

Viola日前與一眾總理出席傳媒午宴，開朗嘅佢，講起東華就滔滔不絕。回想東華情，原來有着千絲萬縷嘅緣分。那些年，爸爸文洪磋於六二年擔任東華總理，只有幾歲大嘅Viola，經常跟隨爸爸出席「東寅會」，即類似嘉年華會嘅聚會，與其他總理嘅小孩打成一片。東華情，初次播種。

長大後，每逢家中有喜宴，佢例必幫父母邀請一圍東華人赴宴，唔少前主席早已係文家嘅座上客。但文家子女當中，反而係哥哥文肇偉最先做東華總理。

馬陳家歡將誕龍B

Viola喺○四年加入東華，其實係多得「靈芝大王」老公陳宇齡（Abraham）推波助瀾。話說Abraham○一年做總理，一做三年，當佢一心想發展中藥事業，嗰年嘅主席陳耀莊再三游說。Abraham遂提議太太「代夫出征」，Viola一口答應。

從此，與東華談起戀愛，難捨難離。Viola屈指一算，爸爸於五十年前任總理，無想過半世紀後，由佢當上主席，感覺真奇妙。

但更蹺嘅係，哥哥文肇偉嘅太太陳妙蘭，都係前東華總理，連同另一位總理親戚在內，一屋六人都係東華人。咁有緣，難怪Viola話要將今年定為「情深繫東華」年嘞。

講到開枝散葉，就快有「東華寶寶」出世。副主席馬陳家歡（Katherine）宣布有喜六個幾月，呢胎仲係男丁添。Katherine第二次做媽咪，有備而來，懷孕初期已book定私家醫院床位，唔怕同雙非孕婦爭喎。

卓妮