違泊嚴重促加欄杆改善
將軍澳車輛違泊情況嚴重，其中寶林佳景路迴旋處旁空地更經常泊滿違泊車輛，劉先生曾向不同部門投訴，並建議加裝欄杆改善情況，「我同啲部門投訴完都冇改善，運輸署仲要話見唔到有車違泊，唔肯加欄杆！」
警方發言人強調一直嚴肅處理將軍澳違泊問題，巡邏警員會積極採取交通管制與執法行動，過去三個月便於佳景路發出數十張告票。
運輸署發言人則稱，曾派員到場視察，只發現有車輛於禁區內違泊，行人路旁邊則未有發現，發言人又指上址為巴士專用行車線，並設有「不准駛入」標誌，駛入車輛已觸犯法例，會將個案轉介警方跟進。
劉先生承認經本報轉介後違泊情況雖已有明顯改善，但對運輸署未有主動作出改善行動深感不滿，「你（運輸署）又唔會成日派人落去巡，乜都唔知話咩畀警方聽？」