一年容易又派位，有人歡喜有人愁。尋日係小一統一派位放榜嘅大日子，對於北區家長及學生嚟講，今年更比往年愁。點解？雙非單非跨境學童蜂擁而來，北區學額本來已經不足，家陣更係雪上加霜，搞到上水區受歡迎嘅小學一位難求，唔少居住本區嘅學童慘被踢去大埔等區返學，唔愁就假！
話說北區校網今年被跨境學童攻陷，一千六百名申請統一派位嘅學童之中，跨境學童就佔咗七成，而全區僅得六百五十幾個統一派位學額，僧多粥少，你話點算？雖然當局諗縮數，每班多派兩名學生，同時加開十六班，但都遠遠唔夠o架，於是焗住向粉嶺及大埔區「借位」應急，可惜總共亦只能夠借到二百幾個學額，唔少學生望門興嘆，被迫跨區返學。
跨境學童霸佔學額，反而土生土長嘅上水學童就被踢去大埔，鵲巢鳩佔，簡直七國咁亂。唔怪得家長怨聲載道，有人指雙非學童搶咗香港學童嘅志願，港府政策失敗，缺乏長遠規劃，搞到港人唔只搵食難，做嘢難，連搵學校都難。亦有校長大吐苦水，指唔少跨境學童冇讀過幼稚園，連英文字母都唔識，加上生活習慣唔同，有人亂拋垃圾，有人連校服都唔着，校方焗住要為佢哋開設適應課程，浪費唔少人力資源，而政府就關人個關。
話時話，家長及校長冇講錯o架，跨境學童逼爆北區，學童返學困難，兩地居民矛盾日益惡化，講到底完全係港府一手造成。當局大開中門，來者不拒，內地孕婦蜂擁來港產子，過去十年雙非嬰兒已累積達十七萬，跨境學童攻陷北區，依家只不過係一個序幕，日後可能仲亂吖。嗱，就算將來只有一半雙非兒童回流就學，都隨時逼爆香港喇，到時點只攻陷北區，全港十八區睇怕遲早淪陷。弊在當局既無長遠規劃，連短期應對措施亦乏善可陳，最叻就係增加六間元朗及北區小學嘅學額，連杯水車薪都未算，你話係咪靠害吖。
再講，究竟有幾多雙非兒童會回流、幾時回流，港府根本矇查查。曾蔭權政府將雙非兒童視為紓緩人口老化嘅靈丹妙藥，當成生力軍，簡直係自欺欺人。老實講，如果雙非兒童大量回流，除咗教育應付唔來，醫療、房屋、就業同樣頂唔順嘅咋。
所以話，煲呔曾實在累人不淺，佢貪威識食，盡地一貪，令香港廉潔文化蕩然無存，咁都算喇，最慘係佢留低雙非呢個計時炸彈，隨時爆大鑊，梁振英政府真係多得佢唔少！