中環出更：馬清鏗瞓身抽iBond
第二輪通脹掛鈎債券（iBond）快將出爐，雖然息率跌到得番三厘幾，但唔少股民仍然認為「有肉食」紛紛準備認購，好似前東華三院主席馬清鏗（Patrick）都話會全力出擊。
身為「潮州冷」嘅Patrick日前出席潮州商會宴會時呻笨話，首批iBond派息有六厘幾，加埋債券價格升幅，回報相當可觀，但佢走寶無抽到，所以今次一於補飛，瞓身認購喎。
不過，身為前東華總理嘅名媛林李婉冰就嫌三厘幾息太少，回報唔吸引，寧願買股票或磚頭好過喇。
「潮人」無處不在
講番當日宴會，其實係慶賀榮任六大慈善團體嘅「潮人」，包括東華就有總理陳曉鈴，即係富商陳有慶孫女、保良局副主席鄭錦鐘、總理蔡李惠莉、陳正欣等。博愛都唔弱，有主席潘德明及副主席彭少衍；仁濟醫院就有主席鄭承隆，所以話「潮人」真係無處不在。