中環出更：震宇姊弟 輪流陪阿媽食晏
已故全國政協副主席霍英東家族近期爆出爭產風波，場官司未知何時完結，官司主角之一嘅霍家長房三公子霍震宇，近日忙於處理訴訟問題，唔多見佢現身。不過，卓妮尋日經過中環置地廣場，就見到震宇同佢醉心攝影嘅家姐霍麗萍（Pat）一前一後咁現身喺Cafe Landmark，原來係約咗媽媽食晏。
尋日下晝一點鐘，着西裝嘅震宇一支公走入Cafe Landmark，揀咗個唔起眼嘅卡位坐。雖然係食晏時間，但佢唔似好肚餓，隨意點咗杯橙汁，就拎部iPad出嚟，聚精會神咁投入網絡世界。
iPad送飯 極速掃光
過咗大半個鐘之後，霍震宇終於揮手叫侍應落柯打叫咗碟頭飯，佢以極速十分鐘時間內掃光碟飯，期間一直用iPad送飯。
正當震宇食飽飽之際，霍老太就同一位友人到場，震宇即招呼兩人坐低，又幫佢哋點好嘢食，之後先行離開，睇嚟未有時間談及官司問題。點知喺震宇走咗唔夠一分鐘之後，身穿啡色套裝、戴住墨鏡嘅Pat就出現，「接力」陪媽媽及友人撐枱腳，唔知兩姊弟係咪夾定嘅呢？卓妮見三人邊食飯邊密斟，但霍老太時不時望錶，似係趕時間咁款，果然不出半個鐘，三人就埋單離開喇。
卓妮