政情：正生遊學團到美國交流
本港近年流行暑期遊學團，好似專門協助青少年戒毒嘅正生書院亦唔執輸，校長陳兆焯上月就帶咗五個學生去美國交流，但佢哋唔只去旅遊景點觀光，仲去埋當地嘅監獄、中學、教會同社區中心，同當地嘅青少年分享戒毒嘅心得，點樣重過新生。
目前身在美國嘅陳校長話，佢哋係上月十八號出發，一共會去三個禮拜，行程都幾緊密，先後會去洛杉磯、聖地牙哥、拉斯維加斯及三藩市，除咗會喺當地嘅學校播放由正生書院自家拍攝嘅電影《沒有不可能》外，亦會接受當地華人電台訪問。
其實正生自○六年開始帶學生到海外交流，希望令學生可以大開眼界，又可將學到嘅嘢同人分享，但由於資金有限，所以只能每兩年舉行一次，每次只能帶五名學生，所以希望更多有心人能捐助佢哋嘅交流活動喎。