政情：阿基巨型招牌好「凸」出
立法會前日三讀通過出缺機制安排，有意轉戰超級區議會選舉嘅民協馮檢基喺二讀同三讀期間近乎隱形，眼見九月立法會選舉將至，阿基突然出奇招，借全城鬧爆嘅「貪曾」谷人氣，喺人來人往嘅旺角懸掛寸爆貪曾嘅巨型廣告招牌，驟眼睇落仲好「凸」出添！
有網民喺社交網站報料，見到阿基喺旺角亞皆老街同染布房街交界一幢樓宇外牆懸掛咗個大型廣告招牌，以「政商勾結，無法無天」呢八個字寸爆貪曾，但最吸引市民眼球嘅係，呢個招牌好誇張咁凸咗出亞皆老街，如果大家搭巴士經過時，分分鐘會見到「無天」兩個大字喺車頂掠過。
我哋就呢個「凸」出嘅招牌設計問過阿基，佢話係廣告公司全權負責，由尋日開始懸掛至本月十八日，之前又喺旺角銀行中心附近懸掛類似招牌，至於呢一系列搶眼宣傳要幾多錢，阿基就懶神秘話係商業秘密唔肯透露，但估計起碼要數萬元，對於財力唔大嘅民協嚟講，認真捨得。