政情：廖秀冬唔想提傷心事
前環境運輸及工務局局長廖秀冬（Sarah）在任時力推源頭減廢政策，確實贏到唔少環保團體嘅掌聲，但自從佢卸任後，環保政策已經面目全非。尋日佢到香港大學主講環保，眼見近年香港環保政策停滯不前，新政府又唔主張興建焚化爐，唔知佢有乜感受呢？會否畀到靈感下屆環境局局長呢？
點知Sarah猛咁耍手擰頭，點都唔肯分享環保經驗，莫非Sarah已對現屆政府嘅環保政策死心？佢強烈否認，但就唔想多講喎。其實Sarah在任時已力推港府倣效台北市實行垃圾徵費，點知事隔多年都仲未有定案；而佢當年提倡室內溫度維持攝氏廿五點五度嘅政策，現今推行乏力不特止，好多公共地方嘅冷氣仲凍過以前。
自從邱騰華空降出任環境局局長之後，好多環保政策都搞到一鑊粥，成事不足敗事有餘，睇見當年嘔心瀝血推行嘅政策不進反退，又好難怪Sarah唔想提起啲傷心事嘅。