政情：貪曾執包袱前衰到貼地
貪曾被揭發外訪窮奢極「恥」，多次入住酒店豪華總統套房，浪費納稅人血汗錢，確實天理不容，將來有乜因果報應，完全係佢自作孽。貪曾搞到天怒人怨，除咗關乎佢本身嘅貪婪品性外，從佢嘅八字推算流年運勢亦可略知一二。年初我哋搵嘅術數師曾推算，貪曾會喺執包袱前搞鑊大大鑊嘅，結果真係爆出豪華外訪醜聞。術數師預測貪曾未來數月仍然會講多錯多，更會被下屬累死。
我哋喺年初請來香港術數家協會術數師楊子東，預測一眾高官及立法會議員嘅龍年運勢，從貪曾八字其中嘅年月日三柱批算，批中禍港七年嘅貪曾，會喺農曆三月「精神恍惚、易出錯」，臨執包袱前都會搞鑊大大鑊嘅，佗衰香港，最後全部貼中晒。貪曾豪訪南美，正正就係農曆三月，期間佢入住每晚五萬多元嘅總統套房，相信當時佢萬萬估唔到自己會貪出禍來。
卸任後仍然是非不絕
楊師傅多年來多次批中高官同議員運勢，當中尤以貪曾特別準，只要睇番本報嘅報道就一清二楚。展望未來，楊師傅再批算喺六月五日正式踏入農曆五月後，貪曾命格忌火土、「食傷旺」，意味佢會繼續講多錯多，而且仲會被下屬連累。踏入農曆六月，楊師傅指雖然貪曾到時已經卸任，但是非小人依然不絕。
貪曾六月之後嘅運勢又點呢？正如楊師傅年初講過，農曆九月「天黑地沖」，貪曾嘅運勢未許樂觀，更可能出現「因財失義」，甚至夫婦之間可能有爭拗及反目，只係外人未必會知嘅啫。總括嚟講，貪曾嚟緊幾個月仲有排受，真係有咁耐風流，有咁耐折墮！
講開又講，同貪曾做過同事嘅前政務司司長許仕仁（肥龍）近期亦官非纏身，其實楊師傅年初亦批過肥龍嘅八字，當時叫肥龍小心健康，又話肥龍會喺龍年行忙碌運，曝光率大增，但唔係為咗工作喎。咁為乜而曝光呢？見到佢喺廉政公署出出入入就知啦！