《唔識安慰貪曾》一文見報，發現同文一個二個忽然懷念起秋天，一個話要「掃盡貪曾黃金甲」；一個話「秋天行動令人期待」；一個話期待秋天「徹查貪曾，大快人心」；八月艷陽都未到，咁快就有秋高氣爽嘅期待，早啲啩？
老朽諗起秋天，大多是美麗的回憶，好似發哥與紅姑嘅經典浪漫作《秋天的童話》，而詩詞歌賦，每詠秋天，多令老朽低迴嚮往：「起來攜素手，庭戶無聲……夜已三更，金波淡，玉繩低轉。但屈指，西風幾時來，又不道，流年暗中偷換。」
蘇東坡一句「流年暗中偷換」驚醒老朽，貪曾○七年上任至今，五年來外訪逾五十次，亦即平均一年逍遙遊近十一次，歎得佢啊！更數口精到訪問美國檀香山時，由單睡房山景總統套房，改為雙睡房海景總統套房！貪曾呢位曾是「寂寞推銷員」，原來最叻就係「默默起革命」，面對大海，由單睡房碌到去雙睡房，依然推翻唔倒心中太多貪念，奈何！之不過，臨收工要面對港澳肅貪來勢迅猛的「秋天行動」，老朽除了唔識安慰貪曾，更唔知點教佢趨吉避劫，怎樣「煲呔從此逝，江海寄餘生」？秋天，除了是戀愛季節，這陷阱，偏我遇上，原來仲有「秋決」！
貪曾今年二月遭本報揭發貪盡海陸空，以佢「向前看」不顧禮義廉嘅德行，目中無民，全身icon點睇都係得個「貪」字，咁嘅行政長官，自然唔會有「夜深風竹敲秋韻，萬葉千聲皆是恨」之反省！老朽祝佢長命百歲，避過秋劫！