今日係議席出缺機制草案修訂拉布戰嘅最後一日，除咗人民力量黃毓民死守拉布戰外，其他廿三名泛民主派議員繼續杯葛會議。不過，尋日網上就流傳一段短片，內容講述被視為泛民嘅衞生服務界議員李國麟（Joseph），前晚七點半鐘復會時靜雞雞走入會議廳幫建制派湊夠開會人數，避免流會，如果唔講佢係泛民，人哋仲以為佢已歸邊建制派。
我哋問過Joseph，佢話前晚喺會議廳前廳用緊電腦期間，政制及內地事務局副局長黃靜文突然衝去佢面前，話石禮謙（大舊石）去咗洗手間趕唔切返入會議廳，於是想佢幫手入去湊夠法定人數。Joseph於是好聽話咁入咗會議廳，但佢話坐唔夠一分鐘，就見到大舊石同霍震霆兩人施施然咁趕到，佢於是即刻離開會議廳，根本無參與投票環節喎。
Joseph覺得自己嘅行為完全無問題，又話流會搞到乜都停晒真係完全無好處。雖然Joseph講嘅解釋不無道理，但講到尾有啲政治原則始終都係要堅守嘅，好似白鴿黨涂謹申前日漏咗部電腦喺會議廳，都唔敢行入去攞番啦。