政情:霍泰輝天橋底吹「風」壯膽

將於明年升任中文大學副校長嘅中大醫學院院長霍泰輝最近獲校方頒贈「二十五年長期服務獎」。霍教授話,加入中大實屬緣分,回想當年正在英國進修,點知因父親急病趕返港,咁啱喺醫院遇到兒童血癌權威阮文賓教授,阮教授話即將加盟中大,仲誠邀佢一齊入職,就係咁做到依家。

去年中大醫學院迎接三十周年,霍教授喺晚會上演奏色士風,原來佢當初係邀請前院長鍾尚志教授表演,但鍾教授話一定要佢吹埋一份,佢惟有跟鍾教授特訓,曾試過深夜到深水埗天橋底當街演奏壯膽。

另一位獲頒長期服務獎嘅聯合書院院長馮國培教授,服務中大長達三十五年,係中大唯一曾任兩個不同書院輔導主任嘅教員。馮教授教過唔少醫科生,最感觸係○三年沙士爆發,本身係聯合書院校友嘅謝婉雯醫生不幸殉職,其後書院喺恒生樓宿舍外種咗一棵稱為「英雄樹」嘅木棉紀念謝醫生。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報