政情：Ann蔣選九西漁人得利
立法會九龍西幾個議席中，民建聯嘅票源足可穩佔一席，換句話該黨派邊個參選都能勝出。隨着該黨議員李慧琼（Starry）由九龍西直選轉戰超級區議會議席，懸空嘅議席即時引來黨內一番爭奪，但最後竟然畀該黨副主席蔣麗芸（Ann）漁人得利。不過，據聞阿Ann成功出線別有內情，有傳佢向九龍西班兄弟承諾四年後就會交棒，但政治一日都嫌長，四年後係咪兌現真係天曉得。
現年五十七歲嘅阿Ann，工商界背景濃厚，突然可以脫穎而出替補Starry，相信事出有因。綜合各界嘅消息，首先有傳該黨油尖旺支部中人唔願意畀深水埗支部嘅人接班，所以推選本身位居黨領導層嘅阿Ann接棒。其次阿Ann有意參選立法會已係公開嘅秘密，○八年已有意循新界西參選，結果無疾而終，眼見黨內對今次九龍西議席人選有意見分歧，黨高層順理成章力推阿Ann落戶九龍西還佢心願。
不過，地區人士就對阿Ann上位另有說法，戲言阿Ann年紀有番咁上下，加上有傳佢承諾一旦當選只做四年，所以就力撐佢上位。但亦有人講番句公道說話，話唔係個個都好似阿Ann咁順得人，佢答應出嚟擺平亂局，認真有義氣同唔話得喎，又話阿Ann嘅年紀唔算大，就算四年後都只係六十一歲，比起黨內部分議員，四年後已到達退休年齡，係退都係嗰啲退先啦！
粉碎只做四年傳聞
我哋就傳聞問過阿Ann，佢明確表示正積極考慮參選，但一切仍有待黨中委會通過。不過，佢意有所指話一向有心為社會服務，如果有機會一定會全力以赴，至於四年後係咪繼續服務市民，就要睇吓市民係咪支持喎，間接否認咗只做四年嘅傳聞。究竟係該黨九龍西班兄弟太天真誤信傳聞吖？定係想放風試水溫，謀定而後動呢？不過無論點都好，現階段除咗阿Ann外，睇怕好難搵到個夠分量而又能服眾嘅人選喇。