中環出更：靚太把臂免費豪遊花都
太子珠寶鐘錶主席鄧鉅明太太鄧宣宏雁（Emily），同愛沙尼亞共和國駐港名譽領事林建康太太林黃寧艷，一向情同姊妹，兩位靚太早前把臂同遊法國巴黎一星期，期間行街買嘢、睇時裝騷兼歎盡美食，不知幾開心。Emily笑稱，佢哋喺母親節前夕起程，第一次將囝囝留低畀老公湊，好似重返未嫁時咁美妙喎。
Chanel請坐頭等包食宿
原來兩人係應名牌Chanel邀請，專程出席喺凡爾賽宮舉行嘅時裝騷。行程盡顯豪華舒適，唔只坐頭等機位，仲包食住，帶佢哋參觀總部及唔對外開放嘅工場。Emily話，今次行程令佢大開眼界，包括第一次見識價值過百萬元嘅華麗衣裳，大開眼界。
講起衣着品味，Emily同林太一向咁優雅大方，Chanel嘅淑女打扮啱晒佢哋要求，而且仲係長期擁躉添，難怪受到貴賓式招待。難得一趟深入Chanel大本營，兩位靚太都盡情購物扮靚，帶回唔少戰利品。至於買乜禮物畀老公？Emily笑稱，象徵式買一、兩件咁多啦！
卓妮