中環出更：鄉親校友 齊賀CY做特首
候任特首梁振英（CY）贏得選戰後，同佢有淵源嘅機構組織都戥佢開心，爭住同佢慶祝。最近旅港山東幫同英皇書院就分別舉辦祝賀酒會，山東鄉親送咗一幅「山東子嗣棟樑，振英耀首香江」賀詞畀CY，而CY就將珍藏咗三十五年嘅《錦繡中華》書籍送畀母校英皇，兩個場合都開心熱鬧。
過百名山東老鄉及非山東籍嘅「梁粉」，早前齊集中環隆堡蘭桂坊酒店，與祖籍山東威海嘅CY及前競選辦主席張震遠歡聚。前山東商會副會長梁紹莊、CK仿真髮老闆趙振國、前工業界立法會議員呂明華、「水餃王后」灣仔碼頭創辦人臧健和等山東人喺晒度。
非山東籍嘅粉絲就有華懋集團董事龔中心及夫婿李嬰、孖人牌代理商昌興第三代傳人余壽寧等。曾經捐助一百萬元畀CY參選嘅山東籍慈善家呂世祥，亦都扶老攜幼三代同堂嚟撐CY場。
至於英皇書院嘅祝賀酒會就喺上月十二日假校園舉行，校友前天文台長林超英係搞手之一，仲主持「細說當年情」環節，分享那些年嘅難忘經歷，包括一九八三年訪京之行，即使同學仔歷經舟車勞頓、夜晚瞓賓館地板，亦不當一回事。CY就勉勵大家，不管起跑點距離終點有幾遠、有幾難，只要踏實向前走，憑毅力總會到達終點。完全係CY參選特首嘅寫照。
《錦繡中華》贈英皇
CY仲點名感謝中文科老師陳嘉，佢喺CY就讀中一上第一課時，推介同學仔睇《錦繡中華》呢本書，以便認識祖國名山大川、古物古蹟。呢本書亦係CY踏足社會、領取第一份工資後買嘅一本書，意義非凡，所以當日佢特登將呢本珍藏咗三十五年嘅書送畀母校，由校長陳胡美好代表接受。
卓妮