唉，逃犯終於逃之夭夭，睇怕一定可以逃到天腳底，想捉都捉唔到，真係激死人呀！
功夫茶講嘅逃犯，並唔係普通作奸犯科嘅壞蛋，而係關乎七百萬條命仔嘅政府極高層。即係咁，痛心特首曾蔭權七年以來一事無成，早就被環保團體稱為氣候逃犯。好衰唔衰現屆政府將於七月一日冚旗，到時咯喎，氣候逃犯拍拍屁股走人，改善空氣污染嘅責任甩得一乾二淨，懸紅通緝都冇鬼用。
香港嘅空氣污染究竟有幾嚴重？中文大學研究過六年內由於呼吸系統急症入院嘅五十萬名病人，發現空氣粗微粒濃度愈高，急症入院率相應增加。每立方米增加十個微克，每年因呼吸系統急症入院嘅人數多咗八百三十人，每年因慢性阻塞性肺病入院人數亦增加四百八十二人。
中大指出，空氣質素指標沿用一九八七年標準，環保署○九年提出新嘅空氣質素指標至今未落實，而且未考慮空氣粗微粒嘅影響，呼籲新指標加入粗微粒數據。
簡單咁講，空氣質素愈差，急症入院愈多。你知啦，空氣粗微粒吸入人體，隨時黐心黐肺，冇病都變有病，有病都變大病，求神拜佛千祈唔好大病變冇命！
除咗中大研究，其他團體亦得出空氣污染殺人於無形嘅結論。好似思匯政策研究所咁吖，早前發表報告指出，曾蔭權七年在任期間，處理空氣污染問題不合格，尤其路面排放影響公眾健康，對未來經濟發展造成威脅。報告最得人驚嘅係，舊年係香港路邊空氣污染最嚴重嘅一年，二氧化氮水平不斷上升，估計二○○五年至二○一二年期間，有七千二百四十人因此提早死亡，平均一年冇咗一千條寶貴人命。
擘大口食西北風都會中毒，呢個係香港空氣質素嘅貼切形容。
計功夫茶話齋，氣候逃犯逃到底，既係壞事亦係好事。壞事當然係有人不負責任置身事外啦，簡直係為老不尊、教壞子孫。至於好事咯喎，曾蔭權貪威識食就話係專家啫，更加擅長嘅係傍實富豪黐飲黐食，改善空氣質素呢家嘢，佢梗係一竅不通，七月一日換個特首再試試，或者仲有少少希望見到一番新天新地。
有人話，任何一位新上場嘅特首都係一棵人形許願樹。功夫茶不妨替全港七百萬市民向即將揸莊嘅梁振英許一個願，麻煩閣下諗諗辦法，撥開雲霧見青天，空氣微粒不黐肺！
話時話，曾蔭權唔止係氣候逃犯，亦有機會係貪腐逃犯。不如咁，梁特首一邊改善空氣污染，一邊肅清官場敗類，唔容許特區政府繼續烏煙瘴氣！