許曉暉忽然「樹大招風」，又被批評「忽然文化」，老朽最近亦忽然滿嘴文化，一改平時老粗形象，真係要多得「文化局」未開鑼，老朽已沾了一身文化氣息！
樓巿會處於「冰火」兩極，文化亦有雅俗之鴻溝，老朽年輕時愛研究色情文學，肄業新亞研究所時，原想跟孫述宇教授學「金瓶梅的藝術」，可惜時間上未能巧合，搞到論文也沒有寫，終致讀書不成三大害！如今，情迷字畫古玩，惜阮囊羞澀，只好作罷，依然夜半閉門讀禁書，自得其樂！
嗱嗱嗱！唔好咁就歧視老朽「冇文化」，文化之雅俗亦見仁見智而已。早幾日《時代》雜誌封面刊登了三歲男孩站在小板櫈上吮吸母親乳房的照片，引來不少非議，有人甚至話呢位媽咪在對兒童性騷擾！唉！呢個世界真係好多人腦生蟲，咁神聖嘅世上只有媽媽好哺乳圖，竟睇出色情幻覺，咁有品味嘅雜誌都受到惡俗之譏，你話「文化」點定義才會明確？
文化除了是一種生活方式，亦係個人修養，文化局長未必幫到你幾多。有啲人可以好似很有文化，之不過係戴上假面具。米蘭．昆德拉有篇小說，大致說史太林個仔被德國人俘虜，因為大便時把廁所弄髒，被關押在一起的英國軍官批評，這讓史太林的兒子氣憤莫名，最後一頭撞向電網死了！為了大便而死，雖有文化卻十分悲壯！
所以話，有啲人知恥到不可理喻，有啲人兩腳一伸，卻覺得自己淫賤得有文化，貪得幾夠格！