政情：葉劉疑屈方剛撐自己
《競爭條例草案》預計好快可以恢復二讀。新民黨立法會議員葉劉淑儀一向都話反對立法，仲提修訂刁難政府通過草案。葉太話商界議員黃宜弘同自由黨議員方剛都支持佢。
方剛：我冇話支持佢
我哋問過方剛，點知佢話冇講過會支持葉太嘅修訂，「我哋中小企唔支持立法，佢（葉太）畀咗份copy（有關修訂的副本）我，我冇話支持佢。」究竟係葉太為拉票屈方剛支持佢，定係兩個人溝通上有誤會呢？
葉太就條例草案提出修訂，包括要求政府先規管所有法定團體，再按個別情況作豁免；同埋法例要喺競委會訂立指引後先生效，兩者都同政府立場相違背。方剛就話之前葉太問過佢對立法嘅立場，佢當時表明唔支持立法，但係咪支持葉太修訂就要再睇下先。方剛又話因為自己代表中小企，所以已經得到黨嘅豁免投反對票。我哋都打過電話畀黃宜弘，不過佢冇回覆。