政情:吳克儉諗定計拆炸彈

政界盛傳考評局主席吳克儉七月就會做教育局局長,但佢直至尋日仲未肯承認呢個公開嘅秘密。不過佢話自己畢業後已經從事教育性質工作,絕對唔係外行人,仲話自己兩個仔都係喺香港讀中學,只係其中一個飛去外國讀大學,暗批現時班高官猛咁送仔女去外國留學。吳克儉連個仔都拎出嚟講,睇嚟佢做足心理準備,走入呢個熱廚房。

香港班高官出名崇洋,人人都送仔女出國讀書,不過尋日吳克儉自爆對本土教育充滿信心,所以兩個仔喺香港讀完中學後,一個留港升學,另一個就話想去外國見吓世面,先至出外留學。

吳克儉仲講埋未來點拆國民教育呢個炸彈,佢話現時好多大企業花好多錢畀員工上國情班,如果話畀家長聽學生喺求學時期了解國情,對未來搵工有一定幫助,相信家長就無咁反對國民教育。做人力資源出身嘅吳克儉仲話人力資源同教育係息息相關,所以自己都算有多年豐富教育工作經驗,唔係外行人喎。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報