中環出更：沈運龍斥六千萬 打造廠廈綠洲
做珠寶生意嘅香港各界商會聯席會議秘書長沈運龍（Aaron），點子多多，連寫字樓設計都鍾意搞搞新意思。尋日佢間古珀行珠寶位於紅磡鶴園東街嘅新總部落成啟用，近百名城中政商界老友齊到賀。新總部樓面有一萬五千呎咁大，除咗展示室及辦公室之外，仲有三千呎綠意盎然嘅花園露台，遲啲烏龜、雀仔等動物都會「入伙」添！
尋日到賀嘅老友川流不息，包括理工大學校長唐偉章、開達玩具主席丁午壽、品牌發展局主席陳淑玲、工業總會主席鍾志平、鐘錶業總會前主席黃業光及朱繼陶、「糖薑大王」余達之孫女余皓媛等，眾人對主人家以近六千萬元打造呢片廠區綠洲，讚嘆不已。
兔仔烏龜遲啲「入伙」
沈太Alice帶卓妮行咗個圈，竟然有心曠神怡之感。Aaron好鍾意大自然，佢話喺舊公司養咗幾隻白兔仔及烏龜，仲有雀仔飛嚟喺樹上築巢，不過呢班動物遲啲至入伙。卓妮見露台擺放一張形似半開雀籠嘅特色椅，唔講唔知，原來係西班牙大師級傑作，同現場氣氛襯到絕。
社交名媛寇鴻萍及囡囡唐貝詩都嚟撐場，Aaron講起同寇鴻萍相識過程都幾奇妙。話說十五年前，當時靚女感情失意，同女友人去中東散心，期間幫襯Aaron喺當地開設嘅珠寶店，兩個香港人就咁喺他鄉相遇。
寇鴻萍仲記得，當時買咗好靚嘅南洋珠首飾，到依家都仲會經常幫襯古珀行。尋日兩母女見到啲珠寶首飾就愛不釋手，仲坐埋入貴賓房慢慢睇。
代表中華廠商聯合會嘅立法會議員林大輝都喺度，卓妮問佢嚟緊九月係咪角逐連任，佢不假思索大方承認，全程露出招牌笑容。
卓妮