七年前，冇人估到打滾官場幾十年嘅老油條會衰收尾，而且係臨天光瀨到一褲都係。老油條姓曾名蔭權，官拜香港特別行政區首長，即係無出其右嘅政府阿一。衰收尾情況世間罕見，一方面涉及貪腐行為，一方面涉及尊嚴掃地。
貪腐行為唔使多講嘞，有名你叫「貪曾」吖嘛，曾蔭權貪遍海陸空路人皆見。至於尊嚴掃地，功夫茶到底係講邊一單醜聞呢？唔通係「曾大屋」違規僭建？唔係唔係，相對而言簡直小巫見大巫，煲呔祖屋無論點樣僭建都唔會好似添馬艦新政府總部咁丟人現眼。
冇錯嘞，功夫茶要講嘅尊嚴掃地就係象徵香港權威嘅新政府總部，竟然甩皮甩骨喎，羞家到冇朋友。呢一個耗資超過五十億元興建嘅大白象，被形容為「新一代政府環保建築典範」，啟用至今不足十個月，出醜未停過。
又叫「門常開」嘅新政府總部，先係出現退伍軍人症桿菌，跟住後樓梯水長流變咗大瀑布，最近揭發嘅甩漏情況係行人通道地磚凹凸不平，容易害到路人甲乙丙PK，政府必須急急補鑊重鋪地磚，幾鬼死PK呀。除此之外，門常開亦係電常嘥，平均每月電費三百四十萬元，比起舊政府總部多出四倍。
對於呢一個「新一代政府出醜建築典範」，市民有乜睇法？東方報業民意調查顯示，對於樓梯變瀑布，四成三受訪者直斥係豆腐渣工程；三成一認為甩漏多，危機處處；一成三擔心颱風季節更嚴重。
關於行人通道地磚凹凸不平必須重鋪，三成四市民覺得係當初趕工交貨所致；兩成六狠批政府失職，選料同驗收馬虎；一成九感到失望，因為醜聞工程揭不盡。
嗱嗱嗱，你話曾蔭權係咪衰收尾衰得太離譜吖？如果唔係呢一個貪威識食嘅特首死要面子，係都要強求盡快完工等佢威風八面入內發表最後一份施政報告，成件事都唔會搞到裙拉褲甩，顧得個頭顧唔到隻髻。
三成受訪者直指曾蔭權係罪魁禍首，要為甩漏事件負責；兩成九歸咎佢好大喜功；兩成二不滿佢只顧面子工程。
所以話啫，今年七月一日絕對係值得期待嘅大日子，唔係期待示威人數破紀錄，而係期待政府一哥換人。你知啦，一個連自己個總部都管唔好嘅特首，係冇可能管好香港㗎，而且令到東方之珠抬唔起頭。三成二受訪者認為連串事件淪為國際笑話；兩成三怒斥港府羞家，令香港丟臉；兩成二表示，令人對香港冇信心。
政總甩漏港蒙羞，好在貪曾皮快收。比較失落嘅係，七一遊行冇得高叫口號「曾蔭權落台」，有少少唔慣囉。