政情：浸大揀傳理院長重人品
浸會大學民調風波已告一段落，但外界仍然好關注傳理學院新院長嘅人選。浸大校長陳新滋接受電台訪問時就話，新任院長唔單止要學術好，仲要人品好，第時做唔做民調都交由佢話事。除咗傳理學院有新發展，浸大一路想成立嘅中醫院都有新進展，陳新滋話已物色咗一塊「靚地」，嚟緊會同非牟利機構合作，一批地就會籌錢，希望再過兩三年可以落成。
前浸大傳理學院院長趙心樹雖然已辭去院長一職，不過浸大嘅調查報告疑點重重，一直存有非議。陳新滋話咁快完成調查，係唔想好似傳染病咁，愈傳愈遠，認為趙心樹辭去院長已經算係為事件負責，嚟緊佢會主力喺舊年成立嘅「卡特中心」幫手，專責聯絡美國方面。至於新院長，佢就話第一批超過十人申請，會搵五個面試，希望一兩個月內有聲氣，佢仲話熟悉本地傳媒嘅人選會有優勢，可能前車可鑑啩。