政情：周一鑊有得撈 人人Say No！
雖然下屆嘅食物及衞生局局長已有人選浮面，不過人稱「每周一鑊」嘅現任食衞局局長周一嶽就未有言退等攝位，依家似乎畀佢等到，盛傳佢將會接替或將出任副政務司司長嘅張建宗，出任勞工及福利局局長。不過，社福界同勞工界人人都耍手擰頭話，呢個亂點鴛鴦嘅安排實在係令人非常憂心。
眼見呢一鑊上屆政府舊瘀血有機會留喺新政府，香港社區組織協會主任何喜華就斬釘截鐵咁話：「唔覺得佢係一個合適嘅人選喎！」佢話見到周一鑊搞到公營醫院一團糟就知佢能力有限，不如快快退落嚟啦！
張超雄踢爆當殘障人士冇到
食衞局前身係食物、福利及衞生局，理論上周一鑊對福利政策都有一定認識。可惜佢又畀當時做社福界立法會議員嘅張超雄踢爆，話佢當年連見吓殘障人士家長咁簡單嘅要求都唔肯，仲要白紙黑字咁回覆，話「無需要見」啲家長。話晒周一鑊任局長前曾經活躍復康界，一上任就變得唔識人，張超雄依家講番起都大嘆無奈，只能輕嘆一句「可能佢親疏有別啦！」
張超雄話，如果周一鑊第日要符合新任特首梁振英嘅要求落區，分分鐘會畀人圍堵，因為佢實在做錯過太多嘢喇，佢建議周一鑊尋求突破，唔好再做局長，另覓位置服務社會。
至於勞工界亦唔睇好周一鑊呢個毫無勞工政策經驗嘅人選。職工盟主席李卓人就話，周一鑊於任內毫無建樹之餘，仲搞到醫療政策傾斜於私家醫院，梁振英今次都唔知係咪揀無可揀，所以亂點鴛鴦。
工聯會王國興質疑，周一鑊唔清楚勞工界議題，更遑論對千絲萬縷嘅勞資關係問題有咩高見，今次呢個安排簡直就係丈八金剛，摸不着頭腦。至於佢黨友黃國健（KK）就對現任勞工處處長卓永興好有意見，仲感嘆勞工處有個咁嘅大佬，都好難有咩作為。無獨有偶，卓永興曾任食環署署長，係周一鑊手下，對於勞福局接連「接收」食衞局棄將，就連KK都話，都唔知係咪無地方安置嘅人就會調去勞福局。嘩！如果周一鑊轉埋佢做勞福局局長，咁點知打工仔會唔會叫佢哋兩個做地獄組合呢？